Kryeministri i Kosovës, Albin Kurti, përkujtoi sot 26-vjetorin e sulmit tragjik në kafiterinë “Panda” në Pejë, ku gjashtë të rinj serbë u vranë brutalisht nga shërbimet sekrete serbe, një akt që regjimi i Millosheviqit e përdori për të akuzuar Ushtrinë Çlirimtare të Kosovës (UÇK).
Në një postim të fundit në rrjetet sociale, Kurti e cilësoi këtë sulm si një nga shembujt më të errët të instrumentalizimit të dhunës nga Serbia për qëllime politike dhe propagandistike. Ai rikujtoi se ky krim kishte për synim paraqitjen e UÇK-së si organizatë terroriste, një narrativë e cila do të shfrytëzohej për të justifikuar sulmet gjenocidale të mëvonshme në Kosovë.
Kurti përmendi deklaratat e liderëve serbë, përfshirë presidentin aktual Aleksandar Vuçiq dhe politikanin Vuk Drashkoviq, të cilët kanë pranuar publikisht përfshirjen e shërbimeve sekrete serbe në këtë masakër. Sipas tij, ky është një shembull tjetër i mohimit të vazhdueshëm të krimeve nga ana e Serbisë, jo vetëm në Kosovë, por edhe në Bosnje dhe Hercegovinë, duke përfshirë masakrat e Srebrenicës dhe Reçakut.
“Ballafaqimi me të kaluarën është thelbësor për paqen dhe sigurinë në rajon,” theksoi Kurti, duke kërkuar drejtësi për viktimat dhe zbardhjen e plotë të të vërtetës për sulmin në “Panda.” Ai gjithashtu vuri në dukje se 150 shqiptarë u arrestuan dhe torturuan nga forcat serbe pas këtij akti, përfshirë gjashtë të rinj shqiptarë të cilët më pas u shpallën të pafajshëm nga një gjykatë serbe në vitin 1999.
Në përfundim, Kurti e quajti të domosdoshëm ballafaqimin e Serbisë me historinë e saj kriminale dhe njohjen e pavarësisë së Kosovës si hapa të pandashëm për një të ardhme paqësore dhe të drejtë për rajonin.