Përballja e shumëpritur në mes të Usyk dhe Fury do të zhvillohet më së largu në mars të 2023

Oleksandr Usyk dhe Tyson Fury besohet se do të futen në ring në sfidën ndaj njëri-tjetrit vitin e ardhshëm.

Dy boksierët në kategorinë e peshave të rënda janë parashikuar të përballen që kur Fury i bëri thirrje Usyk pas fitores së tij ndaj Derek Chisora ​​në fillim të këtij muaji.

Ndonëse ende nuk është konfirmuar dita kur do të ndodh ngjarja e madhe, përballja ndërmjet Usyk dhe Fury për titullin e peshave të rënda duhet të ndodhë jo më vonë se data 4 mars, ka thënë menaxheri i boksierit ukrainas, Alex Krassyuk.

Krassyuk u ka dhënë fansave të boksit lajmin e shumëpritur pas pretendimeve se meçi do të zhvillohet në fillim të vitit 2023.

Sipas Mirror , Krassyuk po u përgjigjej fansave në llogarinë e tij në Instagram kur pohoi se: “Të dyja palët ranë dakord të luftonin”.

Krassyuk pohoi gjithashtu se Fury është mirë, pavarësisht se Gypsy King pretendoi më parë se do të kishte nevojë për operacion përpara se të përballej me Usyk,  duke u thënë fansave: “sipas njohurive tona, Tyson Fury është i sigurt dhe i shëndoshë”.

Në anën tjetër Fury pak kohë më parë ngacmoi Usyk, duke thënë se ai nuk është aq i fortë sa kundërshtari i tij i mëparshëm Chisora./Telegrafi