Gjermania thotë “PO”, tanket Leopard do të dërgohen në Ukrainë

Pas një periudhe të gjatë hezitimi, qeveria gjermane më në fund vendosi t’i jepte Ukrainës tanke Leopard 2. Kancelari gjerman Olaf Scholz ka miratuar dërgimin e tankeve Leopard 2 në Ukrainë, duke lejuar edhe vendet e tjera (si Polonia) të bëjnë të njëjtën gjë, raporton revista gjermane Der Spiegel.

Sipas botimit, vendimi ka të bëjë me dorëzimin e të paktën një tank luftarak Leopard 2 A6. Leopard 2 shihet gjerësisht si zgjidhja më e mirë për të pajisur Ukrainën me një forcë të madhe tankesh perëndimore dhe për t’i dhënë asaj një avantazh në ofensivat e mundshme të ardhshme.

Revista gjermane thekson se edhe aleatët e tjerë synojnë të ndjekin gjurmët e Gjermanisë dhe të përforcojnë ushtrinë ukrainase me tanke. Disa vende evropiane kanë treguar se do të donin t’i dërgonin Kievit disa nga tanket e tyre. Por për këtë, ata kanë nevojë për miratim nga qeveria gjermane.