Detajet e para të rrëzimit të aeroplanit në Brazil! Ekspertet vijn me versionin fillestar se çka e shkaktoi tragjedinë me 61 viktima

Autoritetet braziliane kanë nisur një hetim për rrëzimin e tmerrshëm të aeroplanit që la të vdekur 57 pasagjerë dhe katër anëtarë të ekuipazhit.

Përplasja më e madhe e aeroplanit e regjistruar që nga viti 2007 në Brazil tronditi të gjithë banorët e këtij vendi. Edhe pse hetimi sapo ka filluar, disa detaje të vetë rrëzimit të aeroplanit kanë mjaftuar për të krijuar teoritë e para se çfarë mund të ketë shkaktuar rrëzimin.

“Në një rast specifik, imazhet që kemi, mund të shohim që aeroplani ‘ngec’ (stallo). Ky është një term që përdoret për të thënë se aeroplani nuk mund të ruajë më shpejtësinë e tij në lartësi, duke u pozicionuar në ajër, për të mbajtur ngritjen e sigurt dhe të qëndrueshme. Pra, humbet kontrollin, bëhet shumë e vështirë për të rimarrë kontrollin dhe aeroplani përfundon duke u përplasur shumë dhunshëm”, tha specialisti i menaxhimit të rrezikut dhe sigurisë, Geraldo Portela.

Një stallo e tillë, për shembull, mund të formohet për shkak të akullit në krahë dhe braziliani Globo raportoi se ky ishte rasti në këtë fluturim, shkruan cbn.

Inxhinieri i aeronautikës dhe profesori i trafikut ajror në Sao Paulo deklaroi se është ende herët për të folur për shkaqet, por se formimi i akullit mund të shkaktojë rënien e aeroplanit.

“Krahu ka një profil aerodinamik dhe akumulimi i akullit në përgjithësi nën krah mund të bëjë që ky aeroplan të humbasë karakteristikat aerodinamike duke e bërë të vështirë fluturimin. Aeroplanët zakonisht kanë sisteme kundër akullit, madje edhe në krahë, disa madje janë në gjendje të thyejnë akullin nëse formohet ai. Megjithatë, aeroplanët që nuk i kanë këto sisteme duhet të kenë një plan fluturimi që adreson situatat e mundshme të motit në të cilat ata do të kishin probleme me akullin. Pra, nuk është justifikim që të ndodhë aksidenti”, shpjegoi ai.

Shërbimet arritën të heqin kutitë e zeza nga aeroplani, gjë që sigurisht do të kontribuojë në një rindërtim më të shpejtë të gjithçkaje që ndodhi.

Ndryshe, policia e Sao Paulos njoftoi se kishte nisur një operacion për mbledhjen e gjakut nga familjet e viktimave për të identifikuar kufomat./Telegrafi