Ja çfarë dimë për sulmin e Iranit ndaj Izraelit, deri më tani

Irani nisi një sulm me raketa ndaj Izraelit të martën në përgjigje të vrasjes së liderit të Hezbollahut, Hassan Nasrallah dhe të tjerëve, sipas një deklarate nga Korpusi i Gardës Revolucionare Islamike.

Sipas CNN, përcjell Telegrafi, më herët të martën, SHBA-të thanë se besonin se një sulm me raketa balistike ndaj Izraelit ishte i pashmangshëm pasi Izraeli nisi një operacion tokësor në Libanin jugor.

Ja çfarë dimë për sulmin deri më tani:

Mbi 100 raketa të lëshuara

Ushtria izraelite vlerësoi se Irani gjuajti 180 “predha”, por theksoi se nuk ishte numërimi përfundimtar.

Ekipet e CNN panë dhjetëra raketa mbi qytetet e Tel Avivit, Jerusalemit dhe Haifës.

Ndërkohë, ushtria e Jordanisë tha në një deklaratë se “qindra raketa iraniane u lëshuan drejt Izraelit”, duke cituar një burim ushtarak në komandën e përgjithshme të forcave të saj të armatosura.

Disa raketa iraniane goditën drejtpërdrejt në Izraelin qendror dhe jugor, ka thënë një zëdhënës ushtarak izraelit.

Nuk raportohet për të lënduar

Sirenat u ndezën në Izrael ndërsa njerëzve iu tha të futeshin në strehimore ndërsa raketat binin, duke përfshirë kabinetin e sigurisë izraelite, sipas një burimi izraelit.

Nuk pati të lënduar pas sulmit të Iranit, ka theksuar zëdhënësi i Forcave të Mbrojtjes të Izraelit, adm. Daniel Hagari.

Paralajmërimet për përshkallëzim

Misioni iranian në Kombet e Bashkuara theksoi të martën pasdite se përgjigja e Teheranit “është kryer siç duhet” dhe nëse Izraeli “duhet të guxojë të përgjigjet ose të kryejë akte të mëtejshme keqdashjeje, do të pasojë një përgjigje e mëvonshme dhe dërrmuese”.

Ndërkohë një zëdhënës i ushtrisë izraelite tha se “do të ketë pasoja të rënda”.

Mbështetja e SHBA-së

Një zyrtar amerikan i mbrojtjes ka bërë të ditur se forcat amerikane në Lindjen e Mesme “po mbroheshin kundër raketave të lëshuara nga Irani që synonin Izraelin”.

Ndërkohë, presidenti amerikan Joe Biden dhe zëvendës-presidentja Kamala Harris ishin në dhomën e situatës në Shtëpinë e Bardhë duke monitoruar sulmin.

Presidenti “udhëzoi ushtrinë amerikane të ndihmonte mbrojtjen e Izraelit kundër sulmeve iraniane dhe të rrëzonte raketat që synonin Izraelin”, tha një zëdhënës i Këshillit të Sigurisë Kombëtare.

Kryetari i Dhomës së Përfaqësuesve Mike Johnson dhe udhëheqësi i shumicës së Senatit Chuck Schumer janë informuar gjithashtu për sulmin, sipas zëdhënësve të tyre përkatës. /Telegrafi