Kryeministri i Serbisë: “Spiuni kroat” që kemi arrestuar është i vërtetë, me origjinë është serb

Kryeministri serb Millosh Vuçeviq tha të hënën se i dyshuari “spiun kroat”, i cili u arrestua së fundmi në Serbi, ekziston vërtet dhe se ai është me origjinë serbe.

“Nuk e di nëse ka nënshtetësi kroate dhe me të trajtohet sipas ligjit”, tha ai, transmeton Ballkani.info.

Kjo deklaratë erdhi pasi kryeministri kroat Andrej Plenkoviç tha se e gjithë historia “nuk i duket serioze”.

Javën e kaluar, Serbia njoftoi se një gjoja “spiun kroat” ishte arrestuar në zonën e Beogradit, por Zagrebi zyrtar ende nuk e di se për cilin person bëhet fjalë.

Duke folur në margjinat e Forumit Strategjik të Bled të hënën, Plenkoviq e krahasoi spiunin e lartpërmendur me një Yeti, një qenie mitologjike nga Himalajet.

Vuçeviq e hodhi poshtë atë krahasim, duke theksuar se ky person “ekziston me të vërtetë” dhe se ai kishte shkëmbyer informacione të caktuara për të me Plenkoviqin.

“Strukturat tona të inteligjencës do të dalin me të dhëna kur të jetë e nevojshme”, tha Vuçeviq, duke shtuar se shërbimet kroate tashmë e dinë se kush është.

Në deklaratën e tij pas Vuçeviqit, Plenkoviq tha se kolegu i tij serb “nuk i ka dhënë asnjë informacion konkret”, dhe i ka bërë thirrje që të tregojë emrin e personit të arrestuar nëse ekziston vërtet.

“Nuk më duket aspak serioze”, tha Plenkoviq, duke bërë një paralele me filmin kult “Balkan Spy”, në të cilin personazhi kryesor beson se qiramarrësi i tij është një oficer i zbulimit. /Ballkani.info