Kurti takon ish-presidentët Moisiu dhe Sejdiu, diskutojnë për progresin ekonomik dhe bashkëpunimin Kosovë-Shqipëri

Kryeministri i Republikës së Kosovës, Albin Kurti, ka pritur sot në takim ish-presidentët e Republikës së Shqipërisë dhe Republikës së Kosovës, Alfred Moisiu dhe Fatmir Sejdiu.

Takimi vjen pas pjesëmarrjes së tyre në Konferencën “Balkan Leadership Conference”, organizuar nga Federata e Paqes Universale në bashkëpunim me Qeverinë e Kosovës.

Gjatë takimit, u diskutua për progresin ekonomik dhe demokratik të Kosovës, si dhe për bashkëpunimin ndërmjet Kosovës dhe Shqipërisë.

Sipas njoftimit për media thuhet se në veçanti, u theksuan projektet e përbashkëta ekonomike mes dy vendeve, të cilat pritet të forcojnë më tej lidhjet mes dy republikave.

Përveç kësaj, u trajtuan edhe zhvillimet aktuale në rajon dhe në arenën ndërkombëtare.

Të dy ish-presidentët i uruan Kurtit suksese të mëtejshme në drejtimin e vendit dhe shprehën kënaqësinë për arritjet e Kosovës gjatë viteve të fundit në aspektin ekonomik. /Telegrafi/