Mediumi serb: “Ishte provokim apo gafë e madhe? FIFA e publikon karikaturën ku shihet futbollisti Granit Xhaka afër kapitenit serb”

Mediat serbe nuk e kanë pritur mirë karikaturën e shfaqur kohë më parë nga FIFA, ku shihet futbollisti shqiptar nga Kosova, Granit Xhaka duke e “përqafuar”, apo më saktësisht duke ia vendosur dorën në qafë kapitenit të Serbisë, Dushan Tadiq.

Mediumi nacionalist serb, “Kurir” këtë e ka konsideruar si një provokim ose një gafë të shtëpisë së futbollit botëror pasi mediumi në fjalë shfaq urrejtje ndaj përfaqësuesit zviceran, i cili kishte festuar duke e formuar me duar shqiponjën dykrenore kur kishte shënuar pikërisht ndaj Serbisë në Botërorin e Rusisë.

“Provokim apo gafë e madhe? FIFA e publikoi një karikaturë në të cilën provokatori shqiptar e përqafon kapitenin Tadiq”, është titulli i mediumit serb.

“Po ta kemi parasysh faktin se Xhaka, i cili është me kombësi shqiptare, dhe është i njohur për publikun serb për provokime në fushë, e i cili i feston golat duke shfaqur simbolet e ‘shqiponjës me dy krerë’, mund ta pyesim veten se çfarë mesazhi është ky që jepet në karikaturë!”, shkruan tutje “Kurir”.

Xhaka është kapiten i Kombëtares së Zvicrës, dhe ishte lojtari kyq në fitorën e Zvicrrës ndaj Serbisë në Botërorin e Katarit, që ku edhe lojtarët serb, duke përfshirë kapitenin e Serbisë patën konflikte gati fizike me kapitenin e Zvicrrës, shqiptarin Granit Xhaka. 

Xhaka dhe Shaqiri i kishin shënuar golat fitimtarë të Zvicrës ndaj Serbisë edhe në Botërorin 2018 dhe me këtë rast, të dy kishin festuar duke e formuar shqiponjën dykrenore.