Paralajmërim për protesta qytetare në Serbi! Vuçiç thotë të ketë marr informacion zyrtar nga Rusia se perendimoret po përgatisin trazira në Serbi

Moska e ka paralajmëruar Beogradin për përgatitjet për trazira masive të iniciuara nga përfaqësuesit e vendeve perëndimore, u tha gazetarëve presidenti serb Aleksandar Vuçiç.

I pyetur për “përgatitjet perëndimore” për një grusht shteti në vend, ai tha: “Sot morëm informacion zyrtar nga Federata Ruse”.

“Informacioni është siguruar përmes kanaleve formale dhe ne po punojmë për ta zgjidhur atë. Për këtë është përgjegjës Agjencia e Sigurisë dhe Informacionit, përveç kësaj, njerëzit në qeverinë serbe dhe agjencitë e tjera që janë të specializuar për këto gjëra janë duke bërë punën e tyre”, theksoi Vuçiç.

“Ata që ëndërrojnë të arrijnë diçka me forcë do të dështojnë. Serbia vazhdimisht po ecën përpara dhe ata nuk mund dhe nuk do ta ndalojnë atë. Ata nuk do të mund ta ndalojnë më kurrë. Ky është mesazhi im për të gjithë, dhe njerëzit tanë nuk kanë asgjë për t’u shqetësuar”, përfundoi ai.

Më herët, gazeta Vecernje Novosti raportoi se anëtarët e opozitës serbe ishin të gatshëm të përfitonin nga protestat në Beograd të planifikuara për 10 gusht për të pushtuar pallatin presidencial, për të eliminuar kreun e shtetit dhe për të nisur të njëjtin skenar si në Ukrainë.