Publikohet video nga stuhia në Palermo, deti “përpiu” jahtin luksoz në 60 sekonda
Një kamera sigurie ka filmuar momentin kur jahti superluksoz “Bayesian” u fundos natën e së dielës në brigjet e Palermos.
“Në vetëm 60 sekonda mund të shihni që anija zhduket”, tha pronari i vilës. “Rastësisht, pasi u publikua lajmi, pashë kamerat. Më thanë fëmijët e mi. Nga rreth 20 kamerat e vendosura në shtëpi, vetëm njëra nuk u rrëzua nga stuhia. Ju mund ta shihni shumë mirë se çfarë po ndodhte”, shtoi ai.
Teksa ende po kryhen kërkime për gjetjen e të zhdukurve, ekipet e shpëtimit kanë paralajmëruar se 24 orët e ardhshme janë “kritike” nëse ka ndonjë shpresë për të gjetur dikë të gjallë, me gjasat që të ketë ajër ende brenda rrënojave.
Rojet bregdetare italiane thonë se personat e zhdukur mund të kenë mbetur të bllokuar brenda jahtit të fundosur. Zëdhënësi Vincenzo Zagarola tha se ata mund të mos kenë pasur kohë të zbresin nga anija pasi ajo u fundos shumë shpejt.
