Zelensky dhe Metsola publikojnë një foto, në prapavijë shihet Ibrahim Rugova

Ibrahim Rugova është një nga politikanët më të njohur ndërkombëtarisht të Kosovës. Ndonëse ka vdekur që 17 vite, sot ai u pa në një fotografi të botuar nga Volodymyr Zelenksy, presidenti karizmatik i Ukrainës, dhe Roberta Metsola, presidente e Parlamentit Evropian.

Në fakt, ishte zonja Metsola, e cila si presidente e PE-së, e mirëpriti Zelenskyn në Bruksel. E pas takimit zonja Metsola zgjodhi të botojë një fotografi në Instagram. Në fotografinë e përzgjedhur, në prapavijë shihet edhe ish-presidenti i parë i Kosovës, Ibrahim Rugova.

Në fotografinë në hollin e Parlamentit Evropian, Rugova shihet i mendueshëm, teksa dy të gjallët, pra Zelensky dhe Metsola shihen në humor të mirë.

Ndryshe, Ibrahim Rugova, lideri i shqiptarëve të Kosovës gjatë viteve 90-ta dhe pas luftës, së bashku me Adem Demaçin, është ndër dy shqiptarët e vetëm që e ka fituar çmimin Sakharov, çmimin për liri të mendimit, të cilin e jep Parlamenti Evropian. Andaj, si fitues i Sakharovit, fotografia e Rugovës qëndron krenarisht në hollin e Parlamentit Evropian, që është institucioni më i lartë përfaqësues i Evropës.

Në fakt, fotografia e Rugovës në PE është përfaqësuesja më e mirë e një përpjekjeje humaniste e të gjatë për liri e demokraci të kosovarëve, e cila u bë e njohur ndërkombëtarisht. Ndryshe, Rugova respektohet e nderohet si përfaqësues i një lëvizjeje pacifiste që kundërshtonte sistemin e apharteidit të instaluar nga ish-diktatori serb, Sllobodan Milosheviq. Për shkak të përpjekjes së tij paqësore, të cilën e ndoqi paekuivoke deri në vdekje, Rugova e mori edhe nofkën e “Gandit të Ballkanit”.