Turqia po kërkon që shteti suedez të fillojë ekstradimin ose dëbimin e ‘terroristëve’ kurdë përpara samitit të NATO-s, i cili pritet të mbahet në muajin korrik në Vilnius.
Edhe pse Suedia ka hequr dorë nga ndalimi i shitjes së armëve për Turqinë dhe ka ndryshuar ligjet e saj kundër terrorizmit, presidenti turk, Recep Tayyip Erdogan ka sinjalizuar se kjo nuk do të mjaftojë.
Turqia po kërkon ekstradimin e më shumë se 130 personave, kryesisht separatistë kurdë, raporton bloomberg.
Në mesin e tyre ka përkrahës të dyshuar të Partisë së Punëtorëve të Kurdistanit (PKK), të cilën SHBA-ja dhe Bashkimi Evropian e cilësojnë si organizatë terroriste, por edhe mbështetës të Forcave Vetëmbrojtëse kurdo-siriane (IPG) dhe ndjekës të imamit turk, Fethullah Gulen, i cili dyshohet se organizoi grusht shtetin në vitin 2016 dhe tani jeton në Pensilvani, SHBA.
Aleatët e NATO-s i kanë bërë vazhdimisht thirrje Turqisë që të miratojë kandidaturën e Suedisë, duke argumentuar se vendi i plotëson të gjitha kushtet e nevojshme.
Nëse Suedia do të bashkohej me Aleancën e Atlantikut të Veriut, NATO do të fitonte kontrollin mbi Detin Baltik dhe do të kishte një pozicion të rëndësishëm në rajonin e Arktikut.
Pas fillimit të pushtimit rus të Ukrainës, Suedia dhe Finlanda aplikuan bashkërisht për anëtarësim në NATO.
Finlanda përfundoi procesin e anëtarësimit në aleancë në muajin prill, ndërsa Turqia bllokoi kërkesën e Suedisë, duke e akuzuar vendin se po strehon aktivistët politikë të kërkuar për terrorizëm në shtetin turk.
