Një zyrë në Arizona, e përdorur nga fushata e kandidates demokrate për presidente të SHBA-së, Kamala Harrisit, u qëllua me armë zjarri, sulmi i dytë me armë brenda një jave.
Policia në Tempe, Arizona, iu përgjigj denoncimit të zyrës, e cila përdoret gjithashtu nga Partia Demokratike, pasi morën telefonata nga punonjësit për dëmtimin. Të paktën pesë vrima u krijuan në dritaren dhe derën si pasojë e sulmit me plumba.
“Nuk kishte askënd brenda zyrës gjatë orëve të natës, por kjo ngre shqetësime në lidhje me sigurinë e atyre që punojnë në atë ndërtesë, si dhe të atyre që janë afër saj”, tha zëdhënësi i policisë së Tempe, Sgt. Ryan Cook, për ABC News.
Policia e Tempe tha se po analizonte provat dhe po merrte “masa shtesë” pas qëllimit “për të siguruar sigurinë e stafit dhe të tjerëve në zonë”.
E njëjta zyrë ishte qëlluar vetëm një javë më parë, më 16 Shtator, në një incident që policia tha se dukej se përfshinte një armë BB. Ai qëllim ndodhi gjithashtu pak pas mesnatës dhe shkaktoi “dëmtime”, sipas policisë.
Ndryshe, 59-vjeçarja ka planifikuar të vizitojë të premten Arizonën./Telegrafi
