Kryetari i Aleancës për Ardhmërinë e Kosovës, Ramush Haradinaj, ka reaguar ashpër ndaj Kryeministrit të Kosovës, Albin Kurti, i cili me të ndarë 20 milionë euro dëmshpërblim për “Contour Global”-in pas humbjes në arbitrazh ndërkombëtar, fajësoi qeverinë asokohe të udhëhequr nga Ramush Haradinaj.
“Njeri i poshtër”, tha Haradinaj për justifikimet e Kurtit, teksa shtoi se “me faqe të zezë përgjegjësinë për dëmshpërblim po e heqë prej vetes”.
“E pabesueshme ku ka mbërri logjika e politikës trushpërlarëse e Kurtit”.
Postimi i plotë:
Albini çdo ditë po dëshmon se është edhe Kryeministër i dobët edhe njeri i poshtër. Me krenari dhe me lëvdata e ka pas shkelë kontratën me Contour Global (Ministrja e tij i ka dërgu letër dhe ia ka ndërprerë përkrahjen) e me faqe të zezë përgjegjësinë për dëmshpërblim po e heqë prej vetes. E pabesueshme ku ka mbërri logjika e politikës trushpërlarëse e Kurtit.
Kurti e la Kosovën edhe pa 500 MW energji, ku që nga viti 2023 do t’i përfitonte Kosova me çmim prej 83€ e në ndërkohë ka blerë energji deri në 600€ e qytetarit të shkretë jo një por dy herë ia ka rritë çmimin e energjisë.
Kjo është politika e mashtruesit Albin Kurti. E gjuan gurin, e vjedh popullin dhe në mënyrën më të poshtër e fsheh dorën.
